1Cor 10 | PMA | STEP | Tuak ka ahinkuli keil, ekvat kami mivandem kat asa koa kur out en avu orer keil koa amusil Mosis mulamu. En ualien one, Ahi mul koe keil en mahmah onen ka sakin keil amu koteh Atas Hilhili.

1 Corinthians 10

Hihiseien keke Anamaentei Envatien Keil ten Ave Napurun Keil

1 Tuak ka ahinkuli keil, ekvat kami mivandem kat asa koa kur out en avu orer keil koa amusil Mosis mulamu. En ualien one, Ahi mul koe keil en mahmah onen ka sakin keil amu koteh Atas Hilhili. ^a 2 Navong aling rendemien one keke avousil Mosis, suval koa mahmah ka atas enek vi baptaes en keil umai avi meatin keil onen. 3 Keil vasi akan vati veret tas, koa vi manna koa Ahi sani min keil. ^b 4 Ka keil vasi amun vati oai tas koa Ahi sakini kistal ran mari ahat. Mari ahat enek vi tatavolien tai usil Kristo koa musil keil ka san oai min keil en ualien one. ^c 5 Ka avaseini keke Ahi mul lei kat revi keil, vesesal me-Isrel keil vasi, Ahi rositei ven keil. Sakini, kei sakin keil umatmat ka teiai keil one mul retasil en out volvol, ka arrokoltei out ten tokolkatien. ^d

6 Tounah keil ekek koa kistal en keil vi metai tai minir vasel kat ir ernahattei keke rovoumon tounah keil tatisa suval koa keil amumoni. ^e 7 Kami minahatei netan min nana keil suval koa keil amumoni. Veni navong amumoni, amumon tisaen suval koa Tus Votut viteni koa vit,“Navong me-Isrel keil arondan en mari anien keke uva netan min nana koa kur niniven buluk, amunmun houlu ka amatil vituai ral min keil eris.”(Eks 32:6) 8 Ir ronoumtei natisa en aver nasuval koa tei en keil amumoni. Veni Ahi san mahien min keil ven tisaen enek, ka meatin taosen hanumau ka etel emun (23,000) umatmat en avong tas. ^f 9 Ir ronasak vistei ranaleh vurohien onen Kristo namai enir nasuval avong koa tei en me-Isrel keil amum tisa ka Ahi sakin amot tisa uva akat vini keil. ^g 10 Ir ronaselus kututtei en asa koa Ahi mul mumoni suval koa tei en me-Isrel keil amumoni, ka Ahi san angelo tai mai mu vinvini keil. ^h 11 Tounah keil enek kur out en keil keke avahi metai keil avasel kat meatin sav keil. Ka amutisi vahi selkatien minir koa romoul en avong koanik koa vesesal out netan ka tounah koa mul ien hevuol.

12 Sakini, munak mimundemi keke mimul mimulomal keih veah en demkatien onami, mihelei kat revi minamottei en tisaen. 13 Sakvisien vasi koa mikuri en moulien onami asuval sakvisien keil koa amul umai en meatin vasi keil. Ka Ahi, koa mul vuli kat hatkatien keil onen keke vakataun meatin keil onen, ⁱ kei hermaentei sakvisien tai hemai en kami koa misakras mivali eni. Ka en avong koa tisaen keil umai asak vis kami, Ahi hesan sise min kami keke mivamea rani.

14 Sakini tuak onak eli keil, minahatei netan min nana keil. Anatin, mihelohosae ran sakien enek. 15 Namul naselus min kami suval meatin keil koa vatie mul. Kami mihelei rahit en selusien onak keke vi anatin vuo rovitei anatin. 16 Mihendem visi. Navong ir romun uaen en Anien Votut onen Asuv koa romasmas Ahi veni, romundem usil ran Iesu Kristo koa mutut ir. Ka navong rovul vahas veret ka rokan vituai eni, romundem usil aven Iesu koa mat en aiveave venir. En sakien enek ir rorie lati keke romai rovi aven Iesu Kristo koa tas. ^j 17 Romul rovul vahas veret tas. Sakini, navong rokanian vituai, rorie lati keke, avaseini rovi houlu, rovi aven koa tas. 18 Mihendem vis meatin keil ten out Isrel. Navong keil akan hati sanien koa alingi en ahor ten sanien, keil akapil vituai keke uva netan min Ahi. ^k 19 ?Asa varei vi aneite ten selusien onak? ?Nana tai vi ahi anatin? ?Ka anien koa asani va mini vi tounah tai en meten Ahi? 20 !Vuo, avi heisav enges! Namul naviteni keke buluk ka sipsip keil koa amuasi ka alingi en ahor ten sanien onen nana keil, amul asani min temat keil, arsantei min Ahi. ^l Ka inau ekrovattei li mivaha netan min temat keil ka mivapil vituai vatal min keil. 21 Misakras mivamun uaen en Anien Votut onen Asuv ka, katau, mivaha mivamun uaen emun en out koa uva netan min temat keil ien. Misakras mivanian en avet ten Anien Votut onen Asuv ka mivanian emun en avet en out koa asan sanien min temat keil ien. 22 ?Mukave? ?Mivit mivasakin Asuv vavuroh veni mivit mivousil asuv tamun? ?Mimundemi mivit mikeih imok keke mihelohosae ran vurohien onen? ^m

23 Kami mimul miviteni mivit, “Ahi mul maen komai memumon tounah vasi.” Koanek anatin, ka tei en tounah keil enek artahostei ven kami. ⁿ Mikilea mivahiten selusien koanek, ka tounah houlu rokatauntei moulien onami. 24 Tovuol en kami voumon tounah koa vakataun kei sasen. Vuo, en sakien vasi onami, mihekataun meatin sav keil eni. 25 Sakini, mihoumoni hemukonek: vuseri koa avuli en out ten hulhulien, tahos keke mivahuli ka mivani. Ka minahistei keil keke mivahotini keke vuseri enek ka en sanien koa asani min nana keil veni vahesa napurun rendemien onami. 26 Veni Tus Votut viteni vit,“Out netan ka tounah vasi koa amul ien avi onen Ahi.”(Sam 24:1) 27 Ka munak meatin tai koa rovitei Kristin sisil enuk keke kovanian en teim sen, ka komaeni, kian anien vasi koa sani minuk. Konahistei konahit, “?Anien enek ka kave?” keke kovahotini mal kovani. 28 Ka munak meatin ekek hehiteni minuk hehit anien koanik asani min nana keil, konantei. Veni vahesa kei viteni minuk veni mundemi romaltei kovani. Ka hemukonek, herpuruntei rendemien onen. 29 Navit usil asa koa mal en rendemien onen meatin sav, rovitei rendemien onomi.

Ka vahesa tai en kami hehit kesi minau hehit, “?Vensa nimaen rendemien onen meatin sav heting koe asa koa inau nakilea moumoni? 30 ?Veni munak namasmas Ahi ven anien ak, vensa meatin sav kilea vaselus karen inau veni namul nakani?”

31 Sakini, navong mimul mikanian, vuo mimun etai tounah, vuo en tounah vasi koa mimul mimumoni, mihoumoni en sakien tai koa hehati lat isen Ahi. 32 Anatin, sakien onami napuruntei rendemien onen Siu keil vuo koakeil arvitei Siu vuo rendemien onen koakeil amul en Sios onen Ahi. 33 Sakini, mihoumoni hesuval koa inau namumoni: en tounah vasi koa namumoni nasak visi moumon asa koa mal en meten meatin sav keil. Narmundemteis asa koa hekataun inau enges, ka namundem usil asa koa hekataun meatin sav keil keke vahesa keil ikur demkatien eni ka Ahi houtut moulien one.